A don Pippo De Nobili 
Comu dui stiddi l’occhi stralucenti;
’a faccia ’ncorniciata d’oru e argentu;
e ’nu parrara ducia e lentu lentu:
cchiù parra, e cchiù voleri ppe m’o senti. 
D’inta ’nu mara ’e libri sta cuntentu 
tra professori, amici e tra studenti; 
reposa faticandu ogne mumentu, 
e, all’ammucciuni, aiuta tanti genti.
Anima e cora forta cchiù ’e l’azzaru;
para ’nu S. Franciscu sia lodatu: 
cui l’ha vidutu ’on si l’ha mai scordatu.
O caru don Filippu, sempra caru,
’ntra chissu cora nostru si’ stampatu: 
l’anima tua è ’u sula ’e Catanzaru.